Kwa Nini Kuna Dini Nyingi Sana za Kikristo?

Jibu la Biblia

Watu wametumia mafundisho ya Yesu Kristo kubuni dini nyingi zinazodai kuwa za Kikristo. Hata hivyo, Biblia inasema kwamba kuna dini moja tu ya kweli ya Kikristo. Fikiria sababu tatu zinazotufanya tufikie mkataa huo.

1. Yesu alisema kwamba anafundisha ile “kweli” na Wakristo wa mapema walisema dini yao ndiyo ile “kweli.” (Yohana 8:32;2 Petro 2:2; 2 Yohana 4; 3 Yohana 3) Hilo linaonyesha kwamba wale wanaoendeleza mafundisho ambayo yanapingana na mafundisho ya Yesu hawaendelezi Ukristo wa kweli.
2. Biblia inafundisha kwamba Wakristo wote wanapaswa ‘kusema kwa upatano.’ (1 Wakorintho 1:10) Hata hivyo, dini nyingi za Kikristo hutofautiana kuhusu mafundisho ya msingi kama vile, maana ya kuwa Mkristo. Dini zote hizo haziwezi kuwa za kweli.—1 Petro 2:21.
3. Yesu alitabiri kwamba wengi wangedai kuwa Wakristo lakini wakose kutii amri zake naye angewakataa watu hao. (Mathayo 7:21-23; Luka 6:46) Watu fulani wangeongozwa vibaya na viongozi wa kidini ambao huchafua ibada ya kweli ili kuendeleza masilahi yao wenyewe. (Mathayo 7:15) Hata hivyo, watu wengine wangependelea Ukristo bandia kwa sababu wangeambiwa mambo wanayotaka kusikia badala ya kweli ya Biblia.—2 Timotheo 4:3, 4.

Katika mfano wake kuhusu ngano na magugu, Yesu alitabiri kwamba kutakuwa na uasi-imani mkubwa dhidi ya Ukristo wa kweli. (Mathayo 13:24-30, 36-43) Kwa muda mrefu, watu wangeshindwa kutofautisha kati ya Wakristo wa kweli na Wakristo wa uwongo. Kama vile Yesu alivyotabiri, uasi-imani ulisitawi baada ya mitume kufa. (Matendo 20:29, 30) Hata ingawa huenda mafundisho ya waasi-imani yakatofautiana, aina zote za Ukristo bandia ‘zimegeuka kutoka kwenye kweli.’—2 Timotheo 2:18.

Pia Yesu alitabiri kwamba hatimaye tofauti kati ya Ukristo wa kweli na wa uwongo ungeonekana waziwazi. Hilo limetukia katika siku zetu, “umalizio wa mfumo wa mambo.”—Mathayo 13:30, 39.