Jamaa aliyemtahiri mwanawe kwa kisu kortini Bunda

Moja ya habari iliyoandikwa kwenye magazeti ya leo ni pamoja na hii ya kwenye gazeti la Habari leo yenye kichwa cha habari ‘Amjeruhi vibaya mwanawe kwa kumtahiri kwa kisu’

Gazeti hilo limeripoti kuwa mkazi wa kijiji cha Mihingo wilayani Bunda mkoani Mara, Marwa Elias amefikishwa mahakama ya wilaya ya Bunda kwa tuhuma ya kumtahiri vibaya kwa kutumia kisu, kukata kipande kikubwa cha uume wa mtoto na kumsababishia madhara makubwa mwilini mwake. 

Kwa sasa mtoto anajisaidia haja ndogo kwa shida kutokana na kukatwa sehemu hiyo ya siri vibaya. Inadaiwa baada ya tendo hilo mtuhumiwa huyo alitoweka na kwenda kwenye shughuli zake akimuacha mtoto huyo akiwa kwenye hali hiyo, baadaye hivi karibuni alikamatwa na kufikishwa polisi na kisha mahakamani.

Baada ya kusomewa shtaka lake mtuhumiwa alikana kutenda kosa hilo na kupelekwa mahabusu katika gereza la Nyasura nje kidogo ya mji wa Bunda, baada ya kushindwa kutimiza masharti ya dhamana.